مهم جدا نتكلم عن الداء النشواني لخطورته في مرضى حمى البحر المتوسط.
الأول يعني إيه داء نشواني؟
نشواني جايه من ترسب مادة نشوية (نشاء) على الأعضاء
طيب هل فعلا فيه نشاء بتتكون وتترسب؟
لا. اللي بيترسب هو بروتين الأميلويد اللى بيزيد مع حالات حمى البحر المتوسط نتيجة لزيادة افرازه نتيجة الالتهابات المستمرة فيها.
لما العلماء فحصوا بروتين الأميلويد وصبغوه تحت الميكروسكوب زمان تحول لونه لنفس لون النشاء (Amylum)، لذلك سموه المادة المترسبة شييهة النشاء بالإنجليزي Amyloid
Amyl = نشاء
Oid = شبيه
ومن هنا جاء الاسم “الداء النشواني” من المادة شبيهة النشاء
إيه سببه؟
في الشخص الغير مصاب المادة دي بتفرز مع أي التهاب وبتنزل بسرعة للطبيعي لأن الكلى بتتخلص منها بسرعة لأنها بتبقى كمية صغيرة.
في حالات حمى البحر المتوسط، الارتفاع بيكون كبير جدا مع الهجمات وكمان بيبقى عالي بين الهجمات فالكمية بتبقى كبيرة وحمل كبير على الكلى فبيؤدي إلى ترسبه على الكلى نفسها وعلى باقي أجهزة الجسم.
طيب إيه اللي بيحصل لما يترسب على الكلى والأعضاء؟
لما بيترسب على الكلى، فابتبدأ تفقد وظيفتها بالتدريج فابيحصل رشح للبروتين في البول أولا لعدم قدرة الكلى على الاحتفاظ به، وبعد فترة تفقد الكلى وظيفتها بالكامل مما يؤدي إلى الفشل الكلوي لاقدر الله.
كمان بتترسب على الخصيتين في الذكور والمبايض في الإناث فابيؤدي إن هذه الخلايا بتفقد وظيفتها، مما يؤدي للعقم في الذكور والإناث.
للأسف لو الأميلويد اترسب مافيش علاج بيشيل الترسبات دي
العلاج الوقائي الوحيد هو الكولشسين، هو اللي بيقدر يقلل كميات الأميلويد في الدم وبالتالي بيمنع ترسبه في الأعضاء.
طيب هل ممكن يحصل بالرغم إن الطفل بياخد الكولشسين؟
أه ممكن يحصل لو الطفل مش منتظم على الكولشسين أو أنه بياخد جرعة قليلة منه.
الموضوع ده مهم جدا والمشكله انه مش بيحصل غالبا في سن صغير، بيحصل في عمر ٢٠ أو ٣٠سنه مع زيادة ترسبات الأميلويد فايحصل عقم وفشل كلوي وبالتالي لازم غسيل كلوي عند عمر الزهور والشباب، فلازم نحرص على إعطاء جرعة الكولشسين الكاملة بانتظام لمنع هذه المشاكل الكبيرة التي غالبا لاتظهر في العمر الصغير ولكن تسلب الشاب والشابة أفضل فترة في عمرهم…
لمشاهدة كافة التفاصيل، الرجاء الدخول على هذا الرابط https://dremadfathy.com/watch/2078/
دمتم بصحة وعافية…